Այս մեկ տարին լի էր ակտիվ աշխատանքային պրոցեսով և մի շարք ձեռքբերումներով: Ամփոփելով իմ ուսումնական գործունեության այս մեկ տարին՝ կփորձեմ առանձնացնել էական ձեռքբերումներս:
2013թ-ի սկիզբը նշանակալից էր նրանով , որ մասնակցեցինք Դիջիթեք 2013-ին և «Էլեկտրոնային գիրք» անվանակարգում ստացանք մրցանակ: Այս տարի նույնպես մասնակցելու ենք , բայց ներկայանալու ենք նորովի՝ և՛ որակապես, և՛ տեխնիկապես ավելի հագեցած: Կարևոր ձեռքբերումներից էր նաև բլոգիս ակտիվացումը, որը բացվել էր ավելի շուտ, բայց որպես ուսումնական բլոգ՝ ուսումնական տարածք, սկսեց գործել 2013թ-ի փետրվարից: Բլոգում ներկայացված է մեկ տարվա ընթացքում կատարած իմ ողջ գործունեությունը:
Այս տարին հատկանշական էր նաև նրանով, որ անցանք ուսումնական նախագծերով աշխատելուն : Կազմեցինք աշխատանքային փոքր խմբեր, որտեղ էլ ըստ ուսումնական օրացույցի կազմեցինք նախագծեր և 2013 թ-ի սեպտեմբերից սկսեցինք աշխատել ըստ այդ նախագծերի: Այս կիսամյակի ընթացքում իրականացրել ենք հետևյալ նախագծերը՝ Կոմիտասյան օրեր, Բարձունքի հաղթահարում, Տիեզերք նախագիծ, Խնկոյանական օրեր, Սեբաստացու օրեր, Ամանոր: Նախագծերի իրականացման ընթացքում զարգացան սովորողների մեդիահմտությունները և ստեղծագործական մտածողությունը: Իսկ երբ անցանք անհատական նեթբուք-նոթբուքներով դասընթացին, առաջին հայացքից այդքան բարդ թվացող ուսումնական գործընթացը փոխվեց հետաքրքիր և դինամիկ պրոցեսի:
Մասնակցել ենք նաև «Թատերական փառատոնին» և «Լավագույն տիկնիկային թատրոն» անվանակարգում ստացել ենք մրցանակ:
Կարևորում ձեռքբերում եմ համարում, նաև «Սեբաստացիներ» երգչախմբում հանդես գալը: Թվում էր, թե բոլորս աշխատում ենք նույն դպրոցում և պետք է լավ ճանաչենք մեկս մյուսին , բայց 2013թ-ի ամենշաբաթյա պարապմունքները, ելույթները Երևանում և Երևանից դուրս նպաստեցին ոչ միայն մեր երգեցողության որակական բարձրացմանը, այլև՝ մեկս մյուսին էլ ավելի լավ ճանաչելուն :